विनायकः कर्मविघ्न सिद्ध्यर्थं विनियोजितः । गणानां आधिपत्ये च रुद्रेण ब्रह्मणा तथा । । १.२७१ । । |
तेनोपसृष्टो यस्तस्य लक्षणानि निबोधत । स्वप्नेऽवगाहतेऽत्यर्थं जलं मुण्डांश्च पश्यति । । १.२७२ । । |
काषायवाससश्चैव क्रव्यादांश्चाधिरोहति । अन्त्यजैर्गर्दभैरुष्ट्रैः सहैकत्रावतिष्ठते । । १.२७३ । । |
व्रजन्नपि तथात्मानं मन्यतेऽनुगतं परैः । विमना विफलारम्भः संसीदत्यनिमित्ततः । । १.२७४ । । |
तेनोपसृष्टो लभते न राज्यं राजनन्दनः । कुमारी च न भर्तारं अपत्यं गर्भं अङ्गना । । १.२७५ । । |
आचार्यत्वं श्रोत्रियश्च न शिष्योऽध्ययनं तथा । वणिग्लाभं न चाप्नोति कृषिं चापि कृषीवलः । । १.२७६ । । |
स्नपनं तस्य कर्तव्यं पुण्येऽह्नि विधिपूर्वकम् । गौरसर्षपकल्केन साज्येनोत्सादितस्य च । । १.२७७ । । |
सर्वाउषधैः सर्वगन्धैर्विलिप्तशिरसस्तथा । भद्रासनोपविष्टस्य स्वस्तिवाच्या द्विजाः शुभाः । । १.२७८ । । |
अश्वस्थानाद्गजस्थानाद्वल्मीकात्संगमाद्ह्रदात् । मृत्तिकां रोचनां गन्धान्गुग्गुलुं चाप्सु निक्षिपेत् । । १.२७९ । । |
या आहृता ह्येकवर्णैश्चतुर्भिः कलशैर्ह्रदात् । चर्मण्यानडुहे रक्ते स्थाप्यं भद्रासनं ततः । । १.२८० । । |
सहस्राक्षं शतधारं ऋषिभिः पावनं कृतम् । तेन त्वां अभिषिञ्चामि पावमान्यः पुनन्तु ते । । १.२८१ । । |
भगं ते वरुणो राजा भगं सूर्यो बृहस्पतिः । भगं इन्द्रश्च वायुश्च भगं सप्तर्षयो ददुः । । १.२८२ । । |
यत्ते केशेषु दौर्भाग्यं सीमन्ते यच्च मूर्धनि । ललाटे कर्णयोरक्ष्णोरापस्तद्घ्नन्तु सर्वदा । । १.२८३ । । |
स्नातस्य सार्षपं तैलं स्रुवेणौदुम्बरेण तु । जुहुयान्मूर्धनि कुशान्सव्येन परिगृह्य च । । १.२८४ । । |
मितश्च सम्मितश्चैव तथा शालकटङ्कटौ । कूश्माण्डो राजपुत्रश्चेत्यन्ते स्वाहासमन्वितैः । । १.२८५ । । |
नामभिर्बलिमन्त्रैश्च नमस्कारसमन्वितैः । दद्याच्चतुष्पथे शूर्पे कुशानास्तीर्य सर्वतः । । १.२८६ । । |
कृताकृतांस्तण्डुलांश्च पललौदनं एव च । मत्स्यान्पक्वांस्तथैवामान्मांसं एतावदेव तु । । १.२८७ । । |
पुष्पं चित्रं सुगन्धं च सुरां च त्रिविधां अपि । मूलकं पूरिकापूपांस्तथैवोण्डेरकस्रजः । । १.२८८ । । |
दध्यन्नं पायसं चैव गुडपिष्टं समोदकम् । एतान्सर्वान्समाहृत्य भूमौ कृत्वा ततः शिरः । । १.२८९ । । |
विनायकस्य जननीं उपतिष्ठेत्ततोऽम्बिकाम् । दूर्वासर्षपपुष्पाणां दत्त्वार्घ्यं पूर्णं अञ्जलिम् । । १.२९० । । |
रूपं देहि यशो देहि भगं भवति देहि मे । पुत्रान्देहि धनं देहि सर्वकामांश्च देहि मे । । १.२९१ । । |
ततः शुक्लाम्बरधरः शुक्लमाल्यानुलेपनः । ब्राह्मणान्भोजयेद्दद्याद्वस्त्रयुग्मं गुरोरपि । । १.२९२ । । |
एवं विनायकं पूज्य ग्रहांश्चैव विधानतः । कर्मणां फलं आप्नोति श्रियं चाप्नोत्यनुत्तमाम् । । १.२९३ । । |
आदित्यस्य सदा पूजां तिलकं स्वामिनस्तथा । महागणपतेश्चैव कुर्वन्सिद्धिं अवाप्नुयात् । । १.२९४ । । |