विष्णुस्मृतिः/पञ्चचत्वारिंशत्तमोऽध्यायः
नरकाभिभूतदुःखानां तिर्यक्त्वं उत्तीर्णानां मानुष्येषु लक्षणानि भवन्ति । । ४५.१ । ।
कुष्ठ्यतिपातकी । । ४५.२ । ।
ब्रह्महा यक्ष्मी । । ४५.३ । ।
सुरापः श्यावदन्तकः । । ४५.४ । ।
सुवर्णहारी कुनखी । । ४५.५ । ।
गुरुतर्ल्पगो दुश्चर्मा । । ४५.६ । ।
पूतिनासः पिशुनः । । ४५.७ । ।
पूतिवक्त्रः सूचकः । । ४५.८ । ।
धान्यचोरोऽङ्गहीनः । । ४५.९ । ।
मिश्रचोरोऽतिरिक्ताङ्गः । । ४५.१० । ।
अन्नापहारकस्त्वामयावी । । ४५.११ । ।
वागपहारको मूकः । । ४५.१२ । ।
वस्त्रापहारकः श्वित्री । । ४५.१३ । ।
अश्वापहारकः पङ्गुः । । ४५.१४ । ।
देवब्राह्मणाक्रोशको मूकः । । ४५.१५ । ।
लोलजिह्वो गरदः । । ४५.१६ । ।
उन्मत्तोऽग्निदः । । ४५.१७ । ।
गुरोः प्रतिकूलोऽपस्मारी । । ४५.१८ । ।
गोघ्नस्त्वन्धः । । ४५.१९ । ।
दीपापहारकश्च । । ४५.२० । ।
काणश्च दीपनिर्वापकः । । ४५.२१ । ।
त्रपुचामरसीसकविक्रयी रजकः । । ४५.२२ । ।
एकशफविक्रयी मृगव्याधः । । ४५.२३ । ।
कुण्डाशी भगास्यः । । ४५.२४ । ।
घाण्टिकः स्तेनः । । ४५.२५ । ।
वार्धुषिको भ्रामरी । । ४५.२६ । ।
मृष्टाश्येकाकी वातगुल्मी । । ४५.२७ । ।
समयभेत्ता खल्वाटः । । ४५.२८ । ।
श्लीपद्यवकीर्णी । । ४५.२९ । ।
परवृत्तिघ्नो दरिद्रः । । ४५.३० । ।
परपीडाकरो दीर्घरोगी । । ४५.३१ । ।
एवं कर्मविशेषेण जायन्ते लक्षणान्विताः ।
रोगान्वितास्तथान्धाश्च कुब्जखञ्जैकलोचनाः । । ४५.३२ । ।
वामना बधिरा मूका दुर्बलाश्च तथापरे ।
तस्मात्सर्वप्रयत्नेन प्रायश्चित्तं समाचरेत् । । ४५.३३ । ।